मिति २०७९ माघ २५ गते नेपाल स्काउट मधेश प्रदेश स्काउट कार्यालयले सिराहा नगरपालिकामा सञ्चालित श्री चन्द्र नमूना माध्यमिक विद्यालय र श्री सारश्वरनाथ माध्यमिक विद्यालयमा स्काउट पोशाक वितरण गरिएको छ । प्रदेश संयोजक श्री दिनेश कुमार यादवज्यूको उपस्थितिमा सिरहा नगरपालिकाका नगरप्रमुख डा. नवीन कुमार यादवबाट विद्यालयका प्रधानाध्यापकहरुलाई स्काउट पोसाक हस्तान्तरण भएको हो ।

पोशाक हस्तान्तरण कार्यक्रममा नगरप्रमुख यादवले स्काउटको माध्यमबाट युवा तथा बालबालिकाहरुको बृहत्तर विकास हुने बारेमा आफु जानकार रहेको बताउँदै नगरका सबै विद्यालयमा स्काउट सञ्चालन गर्न तालिम आयोजना गर्ने र अन्य समन्वय समेत गर्ने बताउनुभयो । १०८ वर्ष अघि वि.सं. १९७१ मा स्थापित श्री चन्द्र नमूना मा.वि.मा लामो समयपछि स्काउट गतिविधी हुन लागेकोमा विद्यालयका प्राचार्य मधुसुदन कर्णले खुसी व्यक्त गर्दै नेपाल स्काउटलाई धन्यवाद ज्ञापन गर्नुभयो । यसैसाथ वि.सं. २००८ सालमा स्थापित श्री सारश्वरनाथ मा.वि.मा पहिलोपटक स्काउट सञ्चालन हुँदैछ ।