विश्व सम्पदा दिवस
April 19, 2023
“विश्व सम्पदा दिवस” को अवसरमा मिति २०८० वैशाख ०५ गते(अप्रिल १८, २०२३) का दिन नेपाल स्काउट मधेश प्रदेश स्काउट कार्यालयको आयोजनामा मधेश प्रदेशको राजधानी जनकपुरमा रहेको धार्मिक आस्था र साँस्कृतिक आकर्षणको केन्द्र जानकी मन्दिरमा अभियानात्मक विशेष कार्यक्रम सञ्चालन गरिएको छ । मधेश प्रदेशको प्रमुख सम्पदाको रुपमा रहेको यस मन्दिरको परिसरमा सम्पदाको जगेर्ना गर्नका लागि आम नागरिक समुदायलाई जागरुक गराउने उदेश्यले मन्दिरमा उपस्थित भक्तजन तथा अवलोकनकर्ताहरुलाई सम्पदा संरक्षण सम्बन्धमा प्रतिबद्धता जनाउन हस्ताक्षर संकलन गरिएको थियो । “म सम्पदा संरक्षणमा प्रतिबद्ध छु” “म सम्पदाको संरक्षण गर्न सधैं उपस्थित हुनेछु” र “म सम्पदा संरक्षणमा स्थानीय सरकारलाई सघाउने छु” भन्ने ३ प्रतिबद्धता बुँदामा लगभग २०० को संख्यामा युवा, प्रौढ तथा सम्पदा संरक्षणमा रुची राख्ने व्यक्तित्वहरुले प्रतिबद्धता स्वरुप हस्ताक्षर गरेका छन् । उक्त अवसरमा सम्पदा संरक्षणका लागि विभिन्न सचेतनामूलक सन्देश प्रदर्शन समेत गरिएको थियो । हस्ताक्षर संकलनबाट सम्पदा संरक्षणमा स्काउटले नियमित योगदान दिनसक्ने र सम्पदालाई आउँदो पिंढीका लागि समेत जोगाई राख्न समुदायसँग सहकार्य गर्न सकिने व्यापक सम्भावना दर्शाउन खोजिएको छ । संकलित हस्ताक्षर युक्त ब्यानर जनकपुर उपमहानगरका नगर प्रमुखलाई हस्तान्तरण गरिने छ । जनकपुर उपमहानर र प्रदेशमा रहेका अन्य सम्पदाहरुको संरक्षण, पुनर्निर्माण र पर्यटकीय दृष्टिकोणबाट सम्पदाको उचित प्रयोगका लागि स्काउट कार्यक्रम मार्फत युवा पुस्तालाई जानकार बनाई समुदायसँग समेत साझेदारी गर्न सकिने विश्वास प्रदेश स्काउट कार्यालयले लिएको छ ।
